Qırım.Aqiqat jurnalisti Vladislav Yesipenko dört yıldan ziyade Rusiye apishanesinde yatqan soñ ilk yaz ayınıñ 20-nde azat etildi ve Rusiye Federatsiyası işğal etken Qırımnı terk etti.
Azatlıq Radiosı Vladislavnıñ azat etilüvini alğışlay ve ABD ve Ukrayina ükümetlerine evge qaytması içün yapqan ğayretleri içün teşekkürler bildire.
"Dört yıldan ziyade Vladislav yapmağan ceza içün apis altında bulundı. O, Rusiye tarafından işğal etilgen Qırımdaki adise-vaqialar aqqında kerçekni bildirmek içün pek yüksek fiyat ödedi. Bu sebepten onı bedeniy ve ruhiy ceetten işkencege oğrattılar. Qadını Katerina ve qızı Stefaniya ile qavuşqanına quvanamız, amma Rusiye akimiyeti qorantasına bergen acını unutıp olamaymız. Vladislavnıñ azat etilmesine yardım etken ABD ve Ukrayina ükümetlerine minnetdarmız. Bundan ğayrı, halqara toplulıqqa jurnalistlerimizge köstergen destegi içün minnetdarlığımıznı bildiremiz", — dep bildirdi Radio Free Europe/Radio Liberty prezidenti ve baş müdiri Stephen Kapus.
Vladislav Yesipenko — Qırım.Aqiqat leyhasınıñ jurnalisti (Azatlıq Radiosı). O, Qırımdaki içtimaiy ve ekologik meselelerni aydınlata, soqaq soravlarını ve işğal etilgen yarımadada ayat aqqında reportajlarnı çıqara edi. 2021 senesi saban ayınıñ 10-nda Rusiye FSB-siniñ hadimleri tarafından Ukraina mahsus hızmetleri içün malümat toplağanında ve maşnasında "öz başına yapılğan patlav cihazını" saqlağanında qabaatlanıp tutulğan edi.
27 kün devamında jurnalistke mustaqil advokatlar yiberilmedi. Aynı zamanda "Krım 24" devlet telekanalı, Qırım.Aqiqat leyhası içün çalışqanını tasdıqlağan Yesipenko ile intervyü yayınladı.
2022 senesi Qırımnıñ Rusiye kontrolindeki mahkeme Yesipenkonı beş yılğa azatlıqtan marum etmege ve 110 biñ ruble para cezasını tölemege üküm etti. Rusiye prokuraturası onıñ içün 11 yıl istedi. Yesipenkonıñ özü mahkemede Rusiye quvetçileri onı işkencege oğratqanını beyan etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
