İlk yaz ayınıñ 23-ne keçken gecesi Kıyivde Rusiye ordusı tarafından açılğan ateş neticesinde eñ az altı insan elâk oldı, 19 kişi yaralandı. Bunı şeer akimiyeti ve Ukrayina baş prokurorınıñ ofisi bildire.
Darbe neticesinde Şevçenko rayonında beş qatlı mesken evniñ kirişlerinden biri viran etildi. Qomşu evniñ pencereleri patlav dalğası ile qırıldı, yanında taşlanğan maşnalar yandı.
Bundan da ğayrı, Svâtoşın, Soloma, Ğolosiyevo ve Darnıtsâ rayonlarında çoq daireli ve şahsiy evler, ofis binaları, cemaat aşayt müessiseleri, ticaret pavilonları ve maşnalar zarar kördi.
Kıyiv vilâyetinde, Ukrayina Fevqulâde vaziyetler devlet hızmetiniñ malümatına köre, ücüm neticesinde bir sakin elâk oldı, daa sekiz insan yaralandı.
Kıyiv vilâyetiniñ Borıspil rayonında Rusiye ücümi neticesinde eki şahsiy ev yandı. Bika Tserkva rayonında şahsiy ve çoq daireli evler zarar kördi, tibbiy müessise yerleşken musafirhaneniñ binası yıqıldı. Buça rayonında dört şahsiy bina ve üç avtomobil zarar kördi.
Umumen ilk yaz ayınıñ 22-nde aqşamdan berli Rusiye arbiyleri Ukrayina territoriyasına 350-den ziyade uçucısız uçaq, 11 "İskander-M/KN-23" ballistik raketa ve beş "İskander-K" qanatlı raketanı uçurdı.
Ukrayina silâlı quvetleri beş qanatlı ve yedi ballistik raketanı, em de 146 uçucısız uçaqnı urıp tüşürdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
